كسرة الرخسيس

اليوم رايحين نديروا مع بعض الكسرة (كسرة الرخسيس)
على بالي كاين بزاف مايعرفوش الطريقة الصحيحة لصنع الكسرة وكاين لي متنجحش في تحضيرها
اليوم رايحة نعطيلكم أسرار نجاحها بالتفصيل
أول خطوة للمبتدءات لازم تكون الكمية صغيرة حتى تتمكني من التحكم في العجينة
المكونات يلزمك دقيق (سميد)نوع جيد قيمة ثلاث خبزات وإذا ماتعرفيش تكيلي خدي علبة مارغرين فارغة حجم نصف كلغ اغسليها ونشفيها واستعمليها
بهذا المقدار لازمنا حوالي نصف كاس زيت نباتي وهنا تقدري تزيدي أو تنقصي حسب الرغبة
لازمنا كذلك خميرة الخبز مقدار ملعقة كبيرة
ملعقة صغيرة سكر ،شوية سينوج وجلجلانية(سمسم) ماء دافئ،وملح طبعا وللنكهة ماء زهر

التحضير:

في ڨصعة خاصة بالخبيز تحطي الدقيق ضيفيلو الزيت وحركي بيدك جيدا حتى يتبسس الدقيق مليح ثم أضيفي السمسم المحمص حطي على جانب الخميرة زايد السكر وعلى الجانب الآخر حطي الملح وأبداي بإضافة الماء الدافئ بالتدريج ذوبي الملح وخلطيه مع الدقيق وذوبي الخميرة كذلك واخلطي كل شئ بالتدريج هنا لازم تتحكمي في كمية الماء بمعنى تصبي بالتدريج حتى تتلم العجينة وتكون طرية لكن مش بزاف وماتكونش ناشفة اعجنيها قليلا وغطيها وخليها ترتاح وتتخمر مدة نصف ساعة إلى ساعة حسب درجة حرارة الغرفة أعيدي العجن جيدا مع التقطيع حتى تصبح طرية وبيضاء ثم لوزيها (إصنعي منها كويرات) خليها ترتاح مدة ربع ساعة في هذا الوقت حطي الطاجين على نار متوسطة حتى يسخن جيدا بعدها ڨرصي الخبزات أي حليها بالحلال على شكل أقراص ثم أخبزيها
طريقة الخبز الصحيحة هي أن تضعي الكسرة في الطاجين وماتقلبيهاش حتى يتماسك جيدا الوجه السفلي إستعيني بمناديل خشنة حتى لاتحترق يداكي ثم إقلبيها على الوجه الآخر وثقبيها بشوكة أو سكين وانتبه حتى لاتحترق حركيها من حين لآخر ولما تنضج جيدا ومن جميع الجهات أخرجيها من الطاجين وحوشيها في النار بمعنى ضعيها بين الطاجين والنار حتى تحمر أطرافها جيدا والصور فيها توضيح أكبر
وتكملي بقية الخبزات بنفس الطريقة
ياربي نكون وفقت في الشرح وتجربوها وتنجحوا في تحضيرها وإسعاد أهل البيت
ولا تنسوا أن تسعدوني بالدعاء